今朝，睇到佢喐都唔喐，就知大事不妙，以前佢每個朝早都會好活潑噉跳嚟跳去。。。之後任憑我點樣搞，佢都冇任何反應，我知道佢已經冇咗心跳。頓時之間，我傻喺度，望住個鐘，返工時間已到，我必須出門，但我唔知點樣處理眼前發生嘅事，有剎那我好想喊，但又好快控制住自己嘅情緒，嗱嗱聲用個膠袋裹住佢，落樓之後交畀一個執垃圾嘅阿婆，之後踏上返工之路。寒風之中，我明明聽到自己喊緊，但卻見唔到眼淚，可能淚水就快流乾。

我知道，而家身邊所有嘅嘢，都會有離開我嘅一日，但失去嘅感覺始終都係好令人心痛。但我會記住佢哋，直到自己都離開咗呢個世界，又或者，喺天堂入面，我哋會再相聚呢。。。聚散離合，係好自然嘅事；緣起緣滅，都係不可強求嘅定律。相聚嘅時刻往往係美好嘅，而分別嘅時刻往往令人痛徹心扉。如果重頭嚟過，叫你再揀，你會唔會後悔？我諗，如果會後悔嘅，噉你一定冇付出過真心。

今日開始，屋企又恢復咗平靜，呢一年嚟佢帶畀我好多歡樂，而家少咗啲生機，會有啲冷清。但咁多年都過嚟啦，我一定會習慣。。。習慣同自己分享心情。。。最後，道一聲：

Wish you all the best...in paradise...but not alone...