瞓捩頸同轉捩點--“捩”字嘅幾種讀法同用法

成日有人瞓覺姿勢好鬼騎呢：唔係攣弓蝦米，縮頭縮髻；就係水翻魚噉，轆嚟轆去；結果呢，瞓醒之後，佢哋就會發覺條頸好似屈親噉啵，呢啲就叫做“瞓捩頸”喇。

重點講下個“捩”字，佢有兩個主要嘅讀法同用法：讀lai，就係瞓捩頸，捩橫折曲噉解；讀lit，就係轉捩點噉解。

讀lai嗰陣仲有一種用法：捩手掟咗佢，捩手抌咗佢，捩手丟咗佢。係呢度捩手解成“順手”，呢種“順手”往往帶有一種唔多好嘅負面嘅情緒喺裡頭：佢去買咗兩注足彩，點知頭兩場就瓜咗，斷晒纜，搞到冇鬼癮，捩手就將張投注單抌咗落垃圾篸。