日誌
呢一刻寫句號——一段特別網事嘅結案陳詞
熱度 8 |
曾經喺網上識到一個男仔，曾經我哋幾好傾，同樣嘅興趣令我哋可以搵到好多共同話題。從嗰陣起，我發覺傾QQ可以唔係一件好無聊嘅事，并以為生活中除咗自己嘅好姊妹，又多咗一名藍顏知己，真係開心到咩噉。因為呢個專業同埋職業，通常我喺人前表現出嚟嘅係最堅強開朗嘅一面，而將內心脆弱同矛盾嘅一面留返畀自己嘅知己，而唔係父母。好多時候其實心係極度敏感，但受性格同職業因素嘅影響先至可以從外表睇嚟若無其事。
對於自己嘅知己，我不嘍都係毫無避忌、無話不談，有咩情緒波動第一個就搵佢。我哋係互相欣賞、關心、尊重同埋互相信任，無論自己事定屋企事都唔需要隱瞞，喺最需要對方嘅時候互相都會盡自己能力幫手一齊解決問題，大家都好自覺，無需太多言辭。
人哋話“人生得一知己足矣”，而我重以為自己好彩到可以得到兩個。我好小心好小心噉去維護，小心到我哋之間嘅話題都唔想同人分享，而凈係想留返畀自己慢慢回味。由於係異性，始終會產生感覺偏差，但我對自己嘅好朋友唔會隱瞞啲乜，有乜就直講，有咩問題就一齊解決，唔會收收埋埋，所以我都如願得到個清晰嘅答案，雖然當我知冇可能時有啲失落感，但重係覺得可以繼續做好朋友。於是，噩夢開始，我繼續無所避忌、繼續樂意分享，關心佢就好似關心自己嘅好姊妹一樣，以為噉樣就算係好珍惜呢份緣，并以為對方會好似我嘅好姊妹噉瞭解我、對待我。
但，一切其實都係自己虛構出嚟嘅幻覺同埋自己嘅一廂情願。從傾Q嘅態度可以睇出，原來佢根本就唔瞭解我，莫話做唔到知己，可能重係兩個世界嘅人添，因為我嘅好知己唔會對我落啲噉嘅言辭刺傷我嘅自尊心（以知己嘅標準，所以佢可能根本就未覺意到），我嘅好姊妹從來都唔會誤解我。以噉嘅標準嚟審視返自己以前嘅態度同作為，似乎真係過分咗啲，對人嘅要求都會多咗好多，雖然我做乜都唔期待回報，但如果佢唔瞭解我，我嘅關心同言行就應該早已遠超出咗佢想像嘅範圍，令佢覺得唔舒服，而我對佢嚟講都係一個麻煩事特別多嘅人。今次就算得到一個教訓，我反省過，係我嘅待人處事方式有問題，或者係因為網絡語言嘅限制性所致。我從一開始就犯落一個好大嘅錯誤，以致后來越錯越離譜，對於因此造成嘅一切損害後果，我只可以講抱歉，真係罪過。
我唔會畀自己錯落去，呢一刻寫句號重嚟得彻，雖然唔會係知己，但做唔到好朋友可以做朋友，做唔到朋友重可以做網友，返返到“得閒傾幾句”嘅初始狀態都一樣OK，曾經應承過人嘅事我一定會做到。我會保存住嗰300幾頁嘅聊天記錄，希望呢一段回憶喺未來可以成為朦朧嘅影子，重可以聞到淡淡嘅清香。
我終於認識到，緣分唔係單憑自己感覺想像出嚟嘅，人生都係“得一知己足矣”，好好珍惜佢就係今生嘅責任，而唔可以太貪。作為一名法律工作者，我應該回返到自己嘅外部人格，儘量少畀啲情緒外泄嘅機會自己。
Jean於3.12晚